Saiha, October 11: Kar kalta Nilai Zan (6/10/2010) atang khan Saiha District-ah ruah sur tanin, Chawlhni zing (10/10/2010) thleng a sur a. He ruahsur hi Inrinni tlai atang khan sur nasa zualin, zan khua in a sur a ni. Chawlhni zing-ah chuan zing inkhawm pawh inkhawm thei lovin Saiha khawchhung veng tam takah chuan inthiah a hnatlan a ngai ani.

Nimin zing khawvar lam pangah , Maubawk leh Theiva inrina lai ramhnuai-a Thingzai (Khawchhakmi ni a hriat) mipathum Vanbuaia Kum 19, Ratu Kum 28 Rengkheng khua ve ve leh Thawkung Kum 21 Takung khua te chu an riahbuk chawpin sabarekakhuangkaih in a hnawl hlawm a, an zinga pakhat Thawkung chu a insaseng thei a, pahnih te erawh chu an boral ani. Chhiattawh chanchin an hriat veleh Maubawk khaw mipui te chuan ruang zawn hna thawk nghalin Chawlhni tlai lamah ruang pahnih te hi an hmu a, Maubawk thlanmual-ah an vuiliam nghal a ni.

He nithum chhung ruahsur hian hmun tam takah leimin a siam mai bakah Retaining Wall chim, lei tla hniam, kawng tlahniam leh kawng khichat te a siam a. Heng leimin leh retaining wall chimte avang hian Saiha khawchhungah inpakhat hnawlin, adang paruk te pawh dinhmun hlauhawma an din avangin thiah ngai an ni. Theiva khua-ah in 7, Tuipui ferry khua-ah in 1, Tuisumpui khua-ah in 2, Zero khua-ah in 4, Maubawk khua-ah in 2 leh Serkawrah in 2 te chu dihmun hlauhawma an awm avangin thiah ngai an ni bawk.

National High way N0. 54 Kawlchaw leh Saiha inkar-ah ringawt pawh hmun sawmthum chuangah leimin in kawng a hnawhpin leh a tichhiat a awm nia thu dawn a ni a. Zero atanga Tuipang lam kawng pawh a chhe viau tura ngaih a ni. Nimin zing dar 10 khan Pu Kunal, IAS Deputy commissioner, Saiha District leh a thawhpui Officers te bakah, MTP (Mara Thyutlia Py) President Dr.K.Rakhu leh a thawhpuite, MADC-a EM thenkhat te, Medical Department leh Police Department ten chhawmdawlna hna thawk tur leh kawng chhiat dan te en tura Tuipang leh Kawlchaw thlenga kal tum pawh Saiha atanga Km 25 vela hla Zero khua pawh thleng thei lovin an lo let leh a. Chawlhni te a loni hlauhva , zin veivak an tam loh laitak ani chungin, inrinni zana leimin avanga kawnglai a tangkhang Hnathial Baptist Nupawl, Saiha-a khawmpui chhim tura lokal te, kawng tha china an mahni hmuak tura Saiha atanga kal te awmna lam pana, berh nuaia ke-a anlo kal han hmuh chu an lainat awm hle a ni.

Tunah hian JCB pasarih hmangin, PWD Saiha Division chuan National Highway No. 54 hi thenfai hna riahchilh meuhvin an thawk mek a, ruah a sur chhunzawm loh chuan tunkar chhung hian in kalpawhna lama harsatna hrang hrangte chu sutkian theih ngei beisei a ni. Telephone (Mobile leh Land Line) service-ah pawh ruahsur nasa avang hian harsatna tamtak Saiha District chuan a tawk mek a, In biak pawh zung zung pawh a har hle a ni. Tun dinhmunah hian thingtlang khaw lam chanchin kimchang pawh a la hriat theih lova, hriat theih chinah chuan leimin avanga nunna chan leh hliam chu an awm lo a ni. Chanchin hi ngaihchan reng ani. Saiha District Bawrhsap Pu Kunal IAS pawhin nimin tlai vek khan a Bungalow-ah Meeting pawimawh kovin, Saiha khawchhunga Buhfai, POL, leh nitin mamawh eichawp thil dinhmun te thlir hovin, hmalak dan tur an sawi ho nghal ani. He ruahsur nasa avanga Tuipui Ferry bula Chhimtuipui lui lian chuan 407 Motor pahnih Balu la tura kal Pi Awmtei Motor leh Motor dang a len bova Pi Awmte-i Motor phei chu chin hriat lohvin a awm mek ani.